Dikhljaripe e nevipengo ko 14 00h

Savato, 19. maji 2012.

PROKUPLJE – Roma kotar Toplicako regioni ano avutno vakti šaj te len buti ano umal reciklaža thaj agro-biznis, vakardo ano paraštuj ano prezentuibe projekti vaš Ekonomiako zoralipe thaj bućarnipe e Romengo ano Prokuplje. Plani vaš reslibe problemia e bibućarniasko thaj ekonomiake zoralipasko e Romengo ano Toplicako regioni khedinga reprezentatoria odola uškavda populaciake thaj lokalno kokorodirekciake kotar Prokuplje, Blac, Kuršumlia thaj Žitoradja. Projekti ekonomiako hzoralipe e Romengo ano Toplicako regioni finansirinela Evropaki unia thaj Fondi vaš barjardo amalipe. “Vaš Roma ano avutnipe ka ovol but than vaš putaribe neve butikerdutne thanengo ano umal reciklaža thaj agro biznis”, vakargja agenciake Beta koordinatori odole projektesko Osman Balić. Ov phenga kaj familiarno manufukatura, mini fabrikenca vaš reciklaža, ano plantažno barjaripe drabjenge čarja, adikaribe zaradiengo bari šansa vaš bućarnipe romana populaciako savi sitoj bikvalifikuimi.

BEOGRAD – Srbia ano kurko alosarela prezidento raštrako, maškar duj kandidatja save ano angluno trujl 6. majea lele majbut avazja. Telo rn dono gendo jekh ano alosaribasko lil sito kandidati koaliciako “Alosaribe vaš pošukar djivdipe” Boris Tadić savo ano angluno trujal lela 25,3 šelestar, a telo rndono gendo duj kandidati koaliciako “Te legara Srbia” Tomislav Nikolić savo lela 25,05 šelestar avazja. Alosardutne hramime ano ulavde evidencei ani Bari Britania, Kanada thaj KAR ka avazinen ano savato ano dujto trujal alosaribasko vaš prezidento Srbhiako. Hakaj avazipasko ano alosaribe 6. majea siolen 6.770.013 dizutne save šaj te avazinen ano 8.390 alosaribaske thana, kotar save 8.323 ano dizja thaj komune ani Srbia, 38 ano 22 phuvja avri raštrata, a 29 ano instituticie vaš adikaribe došalipaske sankcie. Ani Srbia ano zoralipe sito angloalosaribasko tehnipe savo ka ovol dži phanibe alosaribaske thanengo, ano kurko ano 20 sahatja thaj dži kana ovela stopirimi angloalosaribaski propaganda thaj mothavibe gendja alosaribaske rezultatjengo. Agorisarde rezultatja e prezidenteske alosaribaske Republikaki alosaribaski komisia musaj te mothavol majpale dži žoj 24. majea ano 20 sahatja. Alosaribaske thana ano kurko ka oven putarde ano 7 sahatja, a ka phanenpe ano 20 sahatja. Ano odova vakti alosaribask than musaj sajekh te ovol putardo.

NOVI SAD – Ani Vojvodina ano kurko, paše alosaribe vaš prezidento Srbiako, ka adikarolpe ini dujto trujal krainake alosaribasko pedo butipasko sistemi. Alosaribe vaš 120 senatoria Parlamenteske Vojvodina siton kombinuime, adjahar kaj 60 senatoria alsoarde pedo proporcionalno sistemi ano kurko, 6. majea, dži kaj aver kvašipe ka ovol alosardo pedo butipasko sistemi. Ano angluno trujal alosaribasko nijekh kandidati vaš senatoria na lela pobut e 50 šelestar avazja, kobor manglape te phagol ole. Ano dujto trujal angluno ka ovol odova kandidati savo ka ovol ole butipe avazjengo. Koalicia khedimi kotar Demokratikani stranka ka ovol ola ano dujto trujal krainake alosaribasko 50 kandidatja, koaliciako kotar naprednjakia 31, koalicia kotar SPS 16, Khedipe vojvodinake Hungarengo 10, Liga socialdemokratengi ohto, Khedutne regionia Srbia duj, a Liberalno demokratikani partia, Demokratikani strnka vojvodinake Hungarengi thaj Demokratikani stranka Srbia po jekh. Ano Novi Sad alosarenape efta krainake senatoria, ani Subotica štar, ano Zrenjanin thaj Pančevo po trin, ano Sombor thaj Kikinda po duj, dži kaj aver komune ka den po jekh senatori. Ani Vojvodina si 45 lokalno kokorodirekcie.

BEOGRAD – Ano 16 alosaribaske thana tahara ka oven popale alosaribe vaš čekatune džene ano Parlamenti dizako Beograd. Ano popale alosaribe ka avazhen jekha jekh gendo alosardutnengo sar ini ano alosaribe 6. majea, a avazipaske lila ka oven ano grao koloreske. Alosaribe ka oven ano fundo pratsavako Direkciake kriesko kotar eroibe pedo alosaribaske thana ai Grocka, Novi Beograd, Zvezdara, Savski venac, Obrenovac, Rakovica, Palilula thaj Stari grad.

NOVI SAD – Ano pandž alosaribaske thana alosaribe popale ka ovol ano kurko vaš čekatune džene ano Parlamenti dizako Novi Sad. Dizaki alosaribaski komisia stampingja 8.884 alosaribaske lila vaš odola pandž alosaribaske thana. Lafi kotar alosaribaske thana 14, 23, 41, 50 i 193, a ano on alosaribe siton anavde bivalidno ano fundo komentarengo kotar alosaribaski lista "Maja Gojković-Khedutne regionia Srbia".

BEOGRAD – Republikaki alosaribaski komisia denga ano savato mandatja senatorenge alosarde 6. majea kasa kerdepe forme vaš akharibe konstitutivno bešipe parlamentesko, savo musaj te ovol adikardo dži 9. juni. Ano Parlamenti savo siole 250 thana, senatorenge mandatja ano nevo khedipe siolen 11 alosaribaske liste, savenda 5 minoritetenge, a mandatja dende pedo rndo ani lista.

BEOGRAD – Republikaki alosaribaski komisia verifikuingja ano savato agorisardo gendo alosardutnengo ano dujto trujal prezidenteske alosaribasko savo sito 6.771.479. Lafi kotar agorisardo gendo alosardutnengo ani Srbia vaš sa thana lokalno kokorodirekciake thaj ano sa alosaribaske thana. Dujto trujal prezidenteske alosaribasko vakardo vaš kurko, 20. majea, a dizutne Srbiake alosarena maškar kandidatja koaliciake “Alosaribe vaš pošukar djivdipe” Boris Tadić thaj kandidati koaliciako “Te legara Srbia” Tomislav Nikolić.

Beta

Aver artiklia: