RSSDikhljaripe e nevipengo ko 12 00h
Žoj, 9. septembri 2010.
UJEDINJENE NACIJE – Generalno parlamenti KN avdive ka dikhljarol bahami rezoluciako vaš Kosovo savo Srbia ka dol palo avazipe teksti e Evropaka unia. Ministri avrune bukengo Vuk Jeremić ka ovol ano bešipe savo ka lolpe ano 21.00 sahati pedo amaro vakti. Ano bahami rezoluciako bahtekeralape gatisaripe EU te lokarol procesi “dijalogi maškar riga” thaj konstatuinelape kaj procesi dijalogesko kokoro peda peste šaj te ovol faktori tehnipasko, arakhibasko thaj stabilipasko ano regioni. Akava dijalogi šaj te ovol ole vaš reso te barjarol maškaribe, te kerol anglalipe po drom kotar Evropaki unia thaj te lačharol djivdipe e themesko, phenelape ano bahami rezoluciako Srbia.
BEOGRAD – Prezidento Srbiako Boris Tadić phengja ano tetradji kaj khupatni rezolucia Srbiaki e EU ka dol šajipe vaš dijalogi vaš reso kosovake pučipasko savo ka ovol verifikuimo ano Konsili arakhibasko KN. Prekal lafja e prezidenteske Tadić, khupatni rezlucia Srbiaki e EU sito produkti khupatna bukjako thaj konsenzusi but bahamengo phuvjengo, odolengo save anavde biphanglo Kosovo, odole phuvjengo save biphanglipe na anavde ini Srbiako savi ano tehno thaj diplomatiake forme arakhela pere legitimno nacionalno interesja.
BRISEL – Učo reprezentatori Evropaka uniako Ketrin Ešton phengja ano tetradji kaj avazimo khupatno bahami rezoluciako e 27 phuvjengo EU thaj Srbia vaš diskusia kotar Kosovo ano Generalno parlamenti KN “prezentuinela sikavibe amare khupatne anglalipasko kotar evropaki perspektiva Srbiaki”. Ketrin Ešton phengja kaj avazipe rezoluciako ano Generalno parlamenti KN ka doš šajipe “vaš semno anglalipe dijalogesko maškar Beogradi thaj Priština”. Učo reprezentatori vaš avruni politika thaj arakhibe EU “šukar bahtekergja” mothovdipe e prezidentesko Srbia Boris Tadić kotar avutne badžakia ano Generalno paralmenti KN kotar bahami rezoluciako vaš turvinutnipasko gndipe Maškarthemutne krisesko juridikako vaš Kosovo.
BEOGRAD – Ano prmimo bahami rezoluciako vaš Kosovo, savo Srbia avazingja e EU thaj denga ano Generalno paralmenti KN, ačhile siton aktja kotar “bilelini jekhrigaki secesia”, sar ini akharibe prekal dijalogi te resenpe sa “putarde pučipe”. Ano bahami dokumentesko savo avazimo e EU hramimo kaj Generalno parlamenti KN “bahtekerela gatisaripe EU te lokarol procesi dijalogesko maškar duj riga”. Ano dikhipe e anglune bahamea, savo Srbia denga 28. julea, ano prmimo bahami sito ini akti kaj “prekal akanutno turvinutnipasko gndipe e Maškarthemutne krisesko juridikako e 22. julesko 2010. kotar odova aj jekhrigako anavibe biphganglipasko ano jekhipe e maškarthemutne hakajea kana ano pučipe Kosovo thaj palo dikhipe, ini pučipe vaš save dendo gndipe”.
BERLIN – Germaniako ministri avrune bukengo Gido Vetervele bahtekergja ano tetradji ki rat gatisaripe e Srbiako o Generalno paralmenti KN te dol rezolucia vaš Kosovo khupatne e Evropaka unia. Ano mothovdipe savo denga Ministribe avrune bukengo ano Berlini, phenelape kaj šefi germaniaka diplomatiako gndinela kaj “khupatni rezolucia tahara ka ovol avazimi ano Njujorki”. Ano mothovdipe phenelape kaj fakti kaj adjahar reso akana ano dikhipe, prezentuinela suksesi e koncentrišima evropaka diplomatiako.
PARIZ – Francuska bahtekerela e Srbiake vaš haljovibe savo angja e Evropaka unia kotar bahami rezoluciako vaš Kosovo ano Generalno parlamenti KN, phengja ano tetradji šefi francuskaka diplomatiako Bernar Kušner. Ov phengja kaj odova haljovibe putarela dijalogi maškar Beogradi thaj Priština, so Francuska sajekh mangela sine.
BEOGRAD – Premieri Sloveniako Borut Pahor phengja ano tetradji ani Ljubljana ano vakeribe e prezidentea Parlamentesko Srbia Slavica Djukić Dejanović kaj dijalogi sito jekhtuno drom vaš reslibe kosovako problemi, numa ini kaj sa riga musaj te sikaven haćaribe vaš bahamiaa Srbiake. Sar mothavdilo kotar pres servisi srbikane parlamentesko, Pahor ano odova vakeribe phengja kaj Srbia sajekh sine faktori stabilipasko ano regioni thaj sikavgja gndipe kaj odova fakti ka ovol ano dikhipe kana ka rodenpe resja kotar problemia ani relacia e Kosova. Pedo oleske lafja, Srbia siola bare potencialia taj EU našti te mukol “ilo regiako”.
BEOGRAD – Angluno fundono krisi ano Beogradi cidingja rodipe o hagesko došalutno Ratko Mladić te anavolpe mjulo so oleski familia rodingja, phengja ano tetradji agenciake Beta portparoli odole krisesko Gordana Vuković. Vuković phengja kaj rodipe denga 16. junea akale beršeste čhavo e nakhle komandantesko Askeriako Republika Srpska, Darko Mladić prekal advokati, a kaj reso kotar biavazipe krisi angja 28. junea. Pedo odova reso nane dendo eroibe, adjahar kaj reso sito pherdehakajesko thaj procesi sito arhivirimo, phenga oj vakeribe numa kaj Mladićeski familia siola hakaj e kriseske te dol nevo rodipe.
NOVI PAZAR – Mešihati Islameska khupatnako ani Srbia mothavgja ano tetradji kaj centralno bajramesko festuibe ka adikarolpe ani džamia Islameske centreski ano gav Delimedje, nadur e Nove Pazaresta. Palo gatisardo programi kote ka ovol ini Hor savo sikavena ilahije thaj kasida kotar Iran thaj hor ‘Gazi Isa-beg’ medresako, Bajram namaz ka legarol angluno muftia Muamer Zukorlić. Bajramesko festuibe ka lolpe anglo sabajesko namazi (angluno taharakosko rudjisaribe) ano 5.30.
BEOGRAD – Kompania Imlek ka lundjarol pohari devibe thud thaj thudeske produktja ano pašutne marketja dži na anelape stabilno devibe savorengo ani Srbia, mothavdo ano tetradji kotar odoja kompania palo vakeribe e ministresko agroekonomiako Saša Dragin e legardutnenca Imlek. Generalno direktori kompaniako Imlek, savo kerela buti ano butipasko mangiutno investiciono fondi Salford, Slobodan Petrović legargja e ministreske Dragan kaj Imlek prekal piri kompania Dunav habe grupa ka arkahol prekal Srbia te denpe sa manglipe e thudeske.
Beta
pobut →
